༄༅།།   ཆོལ་གསུམ་བོད་མིའི་ཞི་རྒོལ་ལས་འགུལ་ཆེན་མོ།

མྱ་ངན་དྲན་གསོའི་ཆེད་ལོ་གསར་མི་གཏོང་བའི་ལས་འགུལ།

བཙན་བྱོལ།

བོད་ཀྱི་བང་ཆེན་ལས་བཤུས།

ཟླ་འདིའི་ཚེས་༢༡ བྷེལ་ཀོབ་ས་གནས་གཞོན་ནུ་དང་བུད་མེད། གངས་ལྗོངས་རང་བདེན་རྩོད་ལེན་མཐུན་གྱི་ཚོགས་གཙོ་རྣམ་པ་དང༌། ས་གནས་གཞོན་ནུའི་སློབ་སྟོན་པ་རྒན་བློ་བཟང་རྡོ་རྗེ་སོགས་ས་གནས་གནད་ཡོད་མི་སྣ་ཁག་བཅོ་ལྔ་ཙམ་བོད་ཀྱི་བང་ཆེན་ས་གནས་གསར་འགོད་པའི་སྡོད་གནས་སུ་འདུ་འཛོམས་ཀྱིས་ད་ལོ་བོད་གཞིས་བྱེས་གཉིས་སུ་གྱེས་ནས་ལོ་འཁོར་ལྔ་བཅུ་འཁོར་བ་དང༌། བོད་ནང་ཛ་དྲག་དོན་རྐྱེན་བྱུང་བའི་རྒྱུ་མཚན་གྱིས་ལོ་གསར་དུས་སྟོན་བྱེད་རྒྱུའི་དུས་ཚོད་མིན་པས་མྱ་ངན་དྲན་གསོ་ཞེས་པའི་ལས་འགུལ་ཞིག་སྤེལ་དགོས་པའི་སྐོར་བགྲོ་གླེང་དང་ཐག་ཆོད་བྱས་པ་སོང༌།  དེ་ཡང་བྷེལ་ཀོབ་གཅིག་པུ་ཙམ་མིན་པར་འཛམ་གླིང་གང་ས་ན་ཡོད་པའི་བོད་མི་ཡོད་དོ་ཅོག་གིས་དེ་ལ་མཉམ་ཞུགས་དགོས་པའི་འབོད་སྐུལ་ཡང་ཞུ་བཞིན་འདུག ལས་འགུལ་གཙོ་བོ་ནི་ཁང་པར་དཀར་རྩི་མི་གཏོང་བ་དང་མི་མང་མཉམ་འཛོམས་ཀྱིས་གླུ་དང་ཞབས་བྲོ་མི་བྱེད་པ་སོགས་གཙོ་བོ་རེད་འདུག དེ་ཡང་ཁོང་རྣམས་པས་ལས་འགུལ་སྐོར་ཀྱི་གསར་འགོད་གསལ་བསྒྲགས་བྱས་དོན།

དེ་རིང་ང་ཚོས་གཞིས་བྱེས་བོད་རིགས་སྤུན་ཟླ་ཡོངས་དང་འཛམ་གླིང་གི་མི་རྣམས་ལ་གུས་ཞབས་དང་བཅས་ཞུ་རྒྱུར། བོད་མིས་ཧ་ཅང་རྩ་ཆེན་ནམ་གལ་ཆེན་དུ་བརྩི་བའི་ལོ་གསར་ཀྱི་དགའ་སྟོན་དེ་ད་ལོ་མྱ་ངན་དྲན་གསོ་ཞེས་པའི་ལས་འགུལ་ཞིག་ཏུ་བསྒྱུར་ནས་བོད་ཀྱི་ལོ་གསར་འདིར་ྋགོང་ས་མཆོག་གིས་དབུས་འཛམ་གླིང་ཞི་བདེའི་ལམ་སྟོན་པ་རྣམས་སྐུ་ཚེ་བརྟན་ཅིང་ཐུགས་བཞེད་ལྷུན་གྱིས་འགྲུབ་པ་དང༌། དབང་ཤེད་དང་གདུག་རྩུབ་ཅན་ཀྱི་ཀླ་ཀློ་བ་དག་གིས་རྐྱེན་ལམ་དུ་བརྫངས་པའི་དྲང་བདེན་དང་ཞི་བདེ། མང་གཙོ། རང་དབང་དང་བདེན་དོན་རྩོད་ལེན་པ་རྣམ་ཀྱི་ཆེད་སྐུ་རིམ་བསྔོ་སྨོན་འཚོག་རྒྱུ་དང་གཤམ་གྱི་དོན་ཚན་ཁག་དགོས་འདུན་ཞུ་རྒྱུ་མ་ཟད། འཛམ་གླིང་གང་སར་བཞུགས་པའི་བོད་རིགས་ཚང་མ་ལས་འགུལ་དེར་མཉམ་ཞུགས་ཡོང་བའི་རེ་སྐུལ་ནན་མོ་བྱེད་ཀྱི་ཡོད།

༡ ཆོས་ལྡན་གངས་ཅན་ལྗོངས་སུ་རྒྱ་དམར་གཞུང་གིས་ཁྲིམས་འགལ་བཙན་འཛུལ་གྱིས་བོད་མི་རིགས་རྒྱལ་ཁབ་དང་བཅས་པའི་བདག་དབང་བཙན་ཕྲོགས་དང་མི་གསོད་ཁྲག་སྦྱོར། ཉེས་མེད་མནར་གཅོད་བྱས་པའི་ཁྲག་དང་མིག་ཆུའི་ལོ་རྒྱུས་ཁྲོད་བོད་གཞིས་བྱེས་གཉིས་སུ་གྱེས་ནས་ལོ་འཁོར་ལྔ་བཅུ་འཁོར་བ་དང༌། ལྷག་པར་ད་ལོའི་གསུམ་བཅུ་དུས་དྲན་ནས་བཟུང་བོད་ནང་ཞི་རྒོལ་གྱེན་ལངས་ཆེན་མོའི་སྐབས་སོགས་སུ་མི་རིགས་དང་རྒྱལ་ཁབ་ཀྱི་ཆེད་འདས་གྲོངས་སུ་སོང་བའི་གཞིས་བཞུགས་སྤུན་ཟླ་རྣམས་ལ་མྱ་ངན་དྲན་གསོ་དང་ཤུལ་ལུས་སྤུན་ཟླ་ཡོངས་ལ་གདུང་སེམས་མཉམ་བསྐྱེད་ཞུ།

༢ རང་རེའི་གནས་ཚང་རྒྱ་གར་ལ་རང་བྱུང་གནོད་འཚེ་དང་འཇིགས་སྐུལ་བའི་རྐྱེན་ངན་ཁྲོད་འདས་གྲོངས་སུ་གྱུར་པ་དང་རྒྱ་ནག་དང་བོད་ཁུལ་དུ་ས་ཡོམ་དང་གངས་སྐྱོན་སོགས་རང་བྱུང་གནོད་འཚེའི་འོག་གོད་ཆག་དཀའ་སྡུག་བྱུང་བའི་མི་སེར་རྣམས་ལ་ཡིད་སྐྱོའི་སེམས་གསོ་བྱེད།

༣ འཛམ་གླིང་ཐོག་སྟོབས་ཆེན་དང་དབང་ཆེན་རང་འདོད་ཅན་གྱི་བཙན་དབང་འོག་མྱངས་དང་མྱོང་བཞིན་པའི་ཉེས་མེད་ཉམ་ཐག་འགྲོ་བ་ཡོངས་ལ་ཞི་བདེ་དང༌། རང་དབང་གི་མི་ཚེ་ལོངས་སྤྱོད་ཐོབ་པར་ནུས་མཐུ་མངའ་བའི་འཇིག་རྟེན་གྱི་ལྷ་རྣམས་དང་མཁྱེན་ལྡན་པ་རྣམས་ཀྱིས་སྙིང་རྗེས་སྲུང་སྐྱོབ་ཡོང་བའི་གདུང་གསོལ་ཞུ་ཞེས་འཁོད་ཡོད་པ་རེད། མེ་སོར་གསར་འགོད་པ་བཀྲ་ཤིས་བདེ་ལེགས་ཀྱིས།